ايماق باسشىسى نۇرلىبەك نالىباەۆ جول ينفراقۇرىلىمىن دامىتۋدا اتقارىلعان جۇمىستاردى اتاپ ءوتىپ, جينالعان قاۋىمدى جاڭا جولدىڭ اشىلۋىمەن قۇتتىقتادى.
«قىزىلوردا مەگاپوليس بولماعانىمەن, قارقىندى قالالىق ينفراقۇرىلىم مەن ءومىر ءسۇرۋ ساپاسىن ارتتىرۋ, ەكونوميكانى ءارتاراپتاندىرۋ باعىتىندا ناقتى قادام جاساعان قالا. حالىق سانى جىل سايىن ءوسىپ كەلە جاتقان وبلىس ورتالىعىندا ايماق تۇرعىندارىنىڭ شامامەن 50%-عا جۋىعى تۇرادى. ءبىز جۇرتشىلىقتىڭ جايلى ءومىر سۇرۋىنە باعىتتالعان, قاۋىپسىز, تازا, قولجەتىمدى ءارى زياتكەر قالا قۇرۋ باعىتىندا ناقتى قادامدار جاسادىق. وبلىس ورتالىعىنىڭ نەگىزگى كوشەلەرى, شيەلى اۋدانىنان كىرەبەرىس جول, ياسساۋي, جاپپاسباي باتىر ماگيسترالدى كوشەلەرى ءتورت جولاقتى بولىپ كەڭەيتىلدى. بۇگىن تاۋەلسىزدىككە 25 جىل داڭعىلىنىڭ ەكىنشى كەزەڭى اياقتالىپ, ەل يگىلىگىنە تابىستالىپ وتىر.
قورقىت اتا اۋەجايىنىڭ جاڭا تەرمينالىنان باستاپ گاگارين كوپىرىنە دەيىنگى 27,3 شاقىرىم جول ءتورت جولاقتى بولىپ سالىندى. جول بويىنداعى سىزدىق, جاڭاداريا, شىركەيلى كانالدارى ۇستىندەگى 3 كوپىر قايتا جاڭعىرتۋدان ءوتىپ, ءتورت جولاقتى بولىپ كەڭەيتىلدى.
بۇعان بيۋدجەتتەن 23 ملرد 962 ملن تەڭگە ءبولىندى. جولداردى دامىتۋ قالادا ءومىر ءسۇرۋدى الدەقايدا ىڭعايلى ءارى قاۋىپسىز ەتىپ, كولىكتەردىڭ كەدەرگىسىز قوزعالىسىنا وڭ سەپتىگىن تيگىزەدى.
قۇرىلىس جۇمىستارىن ساپالى ءارى مەرزىمىندە جۇرگىزگەن «ۋاد» جاۋاپكەرشىلىگى شەكتەۋلى سەرىكتەستىگىنە قىزىلوردالىقتاردىڭ اتىنان شىنايى العىسىمدى بىلدىرەمىن. جاڭا جول بەرەكەنىڭ باستاۋىنا اينالسىن!
ەلىمىز ەڭسەلى, تاۋەلسىزدىگىمىز ماڭگىلىك بولسىن!», دەدى نۇرلىبەك ماشبەك ۇلى.
راسىمدە جاڭا جولدى ساپالى ەتىپ سالۋعا ۇلەس قوسقان مەردىگەر مەكەمە قىزمەتكەرلەرى قۇرمەت گراموتاسىمەن جانە وبلىس اكىمىنىڭ العىس حاتىمەن ماراپاتتالدى. قوعام قايراتكەرى يبراگيم ابيبۋللاەۆ اق باتاسىن بەردى.
تاۋەلسىزدىك داڭعىلىنىڭ اشىلۋ راسىمىندە اۆتو جانە ۆەلوشەرۋ ۇيىمداستىرىلدى.
شەرۋدە كەيىنگى جىلدارى زاماناۋي تەحنيكامەن قامتاماسىز ەتىلگەن سالالارداعى كولىكتەر كورسەتىلدى.
